فيه ناس مش بتبقى عارفه حتلبس ايه لما تروح تتصور او تحضر انترفيو شركه طيران و فيه ناس تانيه بيبقى لبسها مش ملائم
و متوافق مع متطلبات انترفيوهات شركات الطيران و علشان نعرف ازاي نلبس و ايه اللبس الرسمي الملائم لانترفيوهات شركات الطيران و المواصفات اللي المفروض تكون فيه ده شرح كامل على اللبس لكل من البنات و الولاد كالاتي :
اولا :البنات
----------
حتكلم اول حاجه عن البنات غير المحجبات علشان الكلام كتير عليهم و بعد كده البنات المحجبات كالاتي :
أ) البنات غير المحجبات Unveiled Girls
و هنا اللبس حيكون عباره عن سكيرت " جيبه " و شميز او قميص و عليه جاكت او بلايزر و الشراب و يفضل منلبسش شراب و الكعب و تعالو مع بعض نتكلم عن كل حاجه من الحاجات و مواصفات كل حاجه دي بشئ من التفصيل كالاتي :
- سكيرت " جيبه " : هنا حنلبس سكيرت او جيبه يكون حدودها على منطقه الركبه بالضبط او فوق الركبه بحاجه بسيطه جدا بحيث متكنش ميني جيب خالص و تكوني محافظه على الاداب العامه للانترفيو و احترامك لنفسك و الناس كمان لان ميني جيب او اي سكيرت و جيبه تكون بشكل Over ممنوع منعا باتا في اي انترفيو ككل مش بس في انترفيوهات شركات طيران لاننا مش رايحين عرض ازياء او حفله صاخبه او رايحه تعملي منظر و Show قدام الناس انتي رايحه تدوري على لقمه عيش و شغل و بس يعني خلي عندك وقار و احتراف في لبسك و اي بنت حتلبس سكيرت او جيبه بشكل Over حيكون ده سبب رفضها لان شركات طيران بتحب في البنات الاعتدال و الاحترافيه في اللبس . السكيرت او جيبه بتكون لونها اسود او كحلى لان دي الالوان الاساسيه في اللبس العام لاي انترفيو شركه طيران . محدش يا بنات يلبس سكيرت او جيبه تحت الركبه خالص ممنوع كمان لان لازم تكون المنطقه من اول ركبتك لغايه مشط القدم في رجليكي باينه قدام اللجنه .
ملحوظه : في حاله التقديم في شركات طيران مش بتاخد محجبات هنا لازم نلبس سكيرت مينفعش بنطلون خالص اما في حاله التقديم في شركات بتاخد محجبات لان الشركات دي برده بتاخد غير محجبات هنا ممكن نلبس بنطلون عادي بس الافضل و الاحسن نلتزم بلبس سكيرت او جيبه في كل الاحوال
- شميز او قميص : هنا حنلبس شميز او قميص بس هنا يكون مقفول لغايه عند منطقه الرقبه فوق منطقه الصدر يعني الزرار اللي بيكون عند منطقه الرقبه يكون مفتوح و لو عايزه تقفليه كمان يكون احسن و اشيك . هنا عندنا حالتين للبس القميص او الشميز و هي كالاتي :
1) لو حتلبسي جاكيت يبقى هنا نلبس قميص او شميز بكم كامل و ده الاحسن و الافضل لكن لو حتلبسي قميص او شميز نص كم يبقى هنا لازم متقلعيش الجاكيت خالص
2) لو مش حتلبسي جاكيت يبقى هنا نلبس قميص او شميز نص كام او ممكن نلبس قميص او شميز كم كامل بس نلف الكم و نخليه عند الكوع بحيث ايدك تكون باينه من اول كف اليد لغايه منطقه الكوع بس الاحسن و الافضل نلبس على طول شميز او قميص نص كم
هنا نلبس القميص او الشميز لونه ابيض لو انتي عايزه تكوني فورمال Standard كامل و تكوني لابسه اللبس الكامل الرسمي للانترفيوهات لكن ممكن نلبس الوان في القميص او شميز بس تكون الالوان مناسبه و ملائمه للون السكيرت او جيبه سواء انتي حتلبسي اسود يبقى نجيب لون قميص او شميز ملائم للاسود و نفس الكلام بالنسبه للكحلي و منلبسش الوان غامقه اوي و لا فاتحه جدا يكون في اعتدال في اختيار لون القميص او شميز بس الاحسن و الافضل يكون لون القميص او شميز ابيض
ملحوظه : فيه بنات بيلبسو بلوزات في انترفيوهات بس مش مستحب نلبس بلوزه مع انها مش ممنوعه بتاتا لكن لو عايزه تلبسي بلوزه تكون ساده خالص مفيش فيها شغل كتير تكون بلوزه عاديه بلون مناسب ابيض لو عايزه تكوني Standard كامل او اي لون مناسب للسكيرت و جاكيت بس الاحسن و الافضل طبعا نلتزم بلبس القميص او شميز
- جاكيت : هنا نلبس جاكيت او بلايزر عادي مفيش مشكله بس يكون ملائم للون سكيرت او جيبه يعني لو حتلبسي سكيرت اسود يبقى الجاكيت يكون اسود و لو حتلبسي كحلي يبقى الجاكيت كحلي و هنا لازم زي ما قولت نختار لون القميص او شميز مناسب و ملائم للجاكيت و سكيرت و طبعا الجاكيت يكون كلاسيك فورمال
- الشراب او الجوارب : هنا لو حنلبس شراب يبقى لازم نلبس شراب شفاف يبين رجليكي قدام اللجنه لان اللجنه بتحب تبص على رجلين البنات و تشوفها و تقيمها لانها المنطقه البارزه في جسمك و انتي لابسه اليونيفورم بتاع الشركه لو بتقدم في شركه مش بتاخد محجبات زي القطريه و الامريتس و فلاي دبي و الخطوط الكويتيه و هنا لازم تكون درجه لون الشراب مناسبه لللبسك العام و اهم حاجه تختاري اللون اللي يخلي رجليكي باينه قدام اللجنه و مينفعش نلبس اي حاجه غامقه بس الاحسن و الافضل منلبسش شراب خالص و تسيبي رجليكي كده باينه قدام اللجنه
- الكعب : هنا نلبس كعب بطول مناسب و تكوني مرتاحه فيه تماما علشان يوم الانترفيو حيكون عليكي ضغط كبير خصوصا في الوقفه و المشيه و حركه جسمك علشان كده لازم نلبس كعب ملائم و مريح و يكون طوله مناسب ليكي .
* البنات الطوال : يا ريت نلبس كعب طوله قصير مثلا في حدود 5 سم كده و ميزدتش عن 7 سم علشان يكون وضعيه طولك مناسبه قدام اللجنه و انتي بتعملي انترفيو في حاله لو كنتي واقفه زي الاوبن داي كده
* البنات القصيرين : هنا لازم نلبس كعب طويل شويه علشان يكون طولك مناسب مع ارتفاع الكعب يعني نلبس في حدود 7 -10 سم كده خصوصا علشان يكون طولك ملائم قدام اللجنه و انتي بتعملي الانترفيو و انتي واقفه زي الاوبن داي كده
طبعا في كل الاحوال الارتفاع المناسب للكعب هو بيكون في حدود 5-7 سم و يكون الكعب او الجذمه اسود او كحلى
ملحوظه هامه : ممكن نلبس الطقم الكامل " سكيرت + شميز او قميص + جاكيت او بلايزر " او نلبس فقط شميز او قميص و سكيرت زي اللي في الصوره كده
ب) البنات المحجبات Veiled Girls
هنا حنلبس بدله كامله كلاسيك يكون لونها اسود او كحلى و بنفس الكلام اللي انا قولته للبنات غير محجبات بالنسبه للكعب و الشميز او القميص بس حيكون كلامي كله على الطرحه او الحجاب
الحجاب : هنا حنلبس حجاب او طرحه عاديه ساده لونها مناسب للون البدله اللي انتي حتلبسيها سواء لبستي بدله سوده يبقى هنا نلبس لون طرجحه مناسب للاسود و هكذا بالنسبه للكحلي و ممنوع منعا باتا عمل موديلات في لبس الطرح زي الطرح الاسبانيش و هنا لازم نغطي منطقه الرقبه يا اما نلبس حجاب طويل يغطيها او نقفل القميص و شميز يعني يكون وشك باين بس لان فيه بنات بيبلسو الطرحه و يغطو الشعر بس و يسيبو منطقه الرقبه مفتوحه و ده غلط علشان تكوني ملتزمه بالبس التقليدي الكامل للمحجبات و كمان اوعي تلبسي طرح او حجاب مليان الوان و شغل كتير خليها طرحه او حجاب ساده زي ما قولت و عاديه جدا
ثانيا : الولاد
______
هنا حنلبس بس بدله كلاسيك كامله اسود او كحلي و لازم يكون لون الجرافته مناسب للون البدله اللي انت حتلبسها و كمان القميص يكون ابيض لو انت عايز تكون Standard او تختار لون مناسب ملائم للبدله و تلبس طبعا الجذمه و تكون اسود او كحلي .
ده شرح كامل للبس العام اللي نلبسبه و احنا رايحين نحضر الانترفيوهات او نتصور بيه و ارجو من الجميع الالتزام لان لبسك و حسن اختيارك ليه ممكن يكون سبب نجاحك