البوست التاريخي عن الايلتس من الالف للياء و ازاي تجيب 7 في الايلتس من اول مرة
----------------------------------------------------------------------------------
مبدأيا يعني ايه ايلتس ؟؟ ومين اللي اخترعه ؟؟ ونظامه ايه ؟؟
بص يا معلم
الدكاتره بتوع جامعه كامبريدج في سنه 1989 كانوا قاعدين علي سور الجامعه
و فجأه ضربت في دماغهم انهم يخترعوا نظام امتحان مُعتمد عشان يختبر معرفتك بالانجلش .. عايزين يعرفوا هل انت بتعرف انجلش ولا لأ
عشان كدة ايلتس دة اختصار ل International English Language Testing System
.
عشان تثبتلهم انك بتعرف انجلش لازم تثبت انك بتعرف تقرأ وتكتب وتسمع وتتكلم انجلش كويس
وعشان كدة خلوا نظام الامتحان ده يتكون من 4 فروع :
الاستماع listening
القرايه reading
الكتابه writing
التحدث speaking
وخلوا درجه الامتحان من 9 .. كل فرع درجته النهائيه من 9 .. والمجموع الكلي درجته من 9 برضو
وكل ما جبت درجات عاليه في كل فرع و درجه توتال كمجموع للاربع فروع اكبر .. كل ما كدة اثبات انك بتعرف انجلش كويس اوي
------------------------------------------------------------------------
طيب انواع الايلتس ايه ؟؟ وبمتحنه فين ؟؟ وبدفع فيه فلوس قد ايه ؟؟
.
الايلتس نوعين ..
1- جينيرال ودة بتاع الناس اللي عايزة تهاجر او تشتغل في بلاد لغتهم الاولي انجلش
2- اكاديميك ودة بتاع الناس اللي عايزة تدرس برا مصر في الجامعات والكليات
ولكن بعض التخصصات زي الطب بمختلف انواعه أو التدريس بيبقي في بعض البلاد زي استراليا مطلوب للهجره بتاعتها ايلتس اكاديميك بدل من ايلتس جينيرال
.
لكن عشان متتلخبطش .. احفظها كدة .. ايلتس جينرال ده بتاع الخلعان من البلد والهجره .. ايلتس اكاديميك دة بتاع انك تبقي بروفيسير واحمد زويل في نفسك ..
.
اولا : المكانين المعتمدين في مصر اللي ممكن تمتحن فيهم الايلتس هما
british council and IDP.
ودة لينك موقعهم الرسمي عشان تعرف من عليه اي تفاصيل عايزها
.
ثانيا : النتيجة بتظهر بعد 13 يوم من امتحانك والشهادة بعدها ب 3 ايام .. وصلاحيتها بتكون سنتين .. وبتعرف النتيجه عن طريق الايميل او التليفون او من الموقع بتاعهم .. وممكن تظهر قبل ال 13 يوم حسب الضغط علي الفرع ..
.
رسوم الامتحان 2150 جنيه مصري
.
شويه ملحوظات مهمه :
.
1- لو حجزت معاد ولقيت نفسك مش مستعد للامتحان وعايز تغير معاد الامتحان بتاعك ينفع تغير الميعاد مرة واحدة فقط مقابل 100 جنيه غرامه
بس لازم تروح المكان اللى حجزت فيه عشان تغيره من هناك واقصي معاد للتأجيل 3 شهور
.
.
2- افرض النتيجه طلعت وحاسس انك اتظلمت في جزء من الاجزاء ؟
هتطلب اعادة التصحيح او بيسموها التماس أو بالانجلش اسمها remark ..
.
وخلي بالك الالتماس ب 690 جنيه .. يرجعولك كاملين لو تم اثبات ان ليك درجات ناقصه فعلا .. لكن لو طلعت نتيجه الالتماس negative يبقي هيروحوا عليك
.
والالتماس بيقعد 8 اسابيع علي ما تظهر نتيجته .. وخلي بالك من نقطه مهمه .. لو عملت التماس اوعي تدخل امتحان تاني الا لما نتيجه الالتماس تظهر عشان الامتحان الجديد هو اللي هتتحسبلك درجته فقط حتي لو ليك درجات في الالتماس لانهم بيحسبوا درجه اخر امتحان امتحنته ..
.
.
3- في ست اماكن في مصر ال british council بيمتحن الناس فيهم وهما : القاهرة، والإسكندرية، والمنصورة، وبورسعيد (منطقة القناة)، وطنطا، والأقصر .. شوف اقرب محافظه ليك ايه وسجل معاهم
---------------------------------------------------------------------
طيب ايه هي تفاصيل الامتحان ؟ وهذاكر في وقت قد ايه ؟؟ وكل جزء اجيب فيه سكور عالي ازاي ؟ واذاكره منين ؟؟
.
موضوع تذاكر في وقت قد ايه دة موضوع نسبي بحت يبقي كداب اللي يقولك رقم محدد
الموضوع كله متوقف علي حاجتين :
1- انت مستواك في الانجلش عامل ازاي
2- هتتدرب علي تكنيك الامتحان ازاي
.
بمعني .. انت مثلا خريج ال IG يعني مستواك عالي اوي اوي اوي في اللغه .. ساعتها يادوب هتحتاج بس تتدرب علي تكنيك وطريقه الامتحان في اقل من اسبوع وتخش تجيب 7 و 8 مستريح
.
مثلا انت شغال في شركه مالتي ناشونال مع جنسيات اجانب كتير ومستواك في الانجلش كويس اوي يبقي برضو ناقص بس تتدرب علي ازاي تحل الامتحان في كام يوم بالكتير وهتخش تجيب سكور مستريح
.
لكن لو مثلا انت مستواك متوسط في الانجلش يبقي ساعتها هتاخد وقت شويه ممكن يوصل لكام اسبوع علي ما تعرف تحسن مستواك في الانجلش الاول وبعدين تتدرب علي طريقه حل الامتحان وبعدين في الاخر خالص تخش الامتحان ..
.
يعني الوقت اللي هتاخده عشان تعرف تجيب 7 ولا 8 في الايلتس هيبقي متوقف علي مدي معرفتك اصلا بالانجلش وهل انت اصلا مستواك كويس من البدايه ولا لأ
.
طيب افرض انت ضعيف أو ابيض ميح في الانجلش ؟؟ لو انت ضعيف أو ابيض ميح في الانجليزي يبقي متدخلش الايلتس اساسا ولازم الاول تتعلم انجليزي من اول وجديد وتعرف الاساسيات وبعدين تبدأ بعدها تذاكر تكنيكس الامتحان وبعدين في الاخر خالص تدخل تمتحن ..
.
طب وانا اصلا هعرف مستوايا كويس ولا لأ ازاي ؟
.
عن طريق امتحان تحديد المستوي يا معلم و اللينك اهو .. ادخل اختبر نفسك ولو لقيت نفسك اقل من B2 متدخلش الايلتس
1- بدايه الامتحان بتكون بجزء السماع (Listening) : مدته نص ساعه
الليسننج عباره عن 40 سؤال .. كل اجابه سؤال صح بتتحسب بدرجه
- لو حليت 39 أو 40 سؤال صح هتاخد 9 درجات
- لو حليت 37 او 38 سؤال صح هتاخد 8.5 درجات
- لو حليت 35 او 36 سؤال صح هتاخد 8 درجات
- لو حليت 33 او 34 سؤال صح هتاخد 7.5 درجه
- لو حليت 30 او 31 أو 32 سؤال صح هتاخد 7 درجات
- لو حليت 27 او 28 او 29 سؤال صح هتاخد 6.5 درجه
- لو حليت من 23 ل 26 سؤال صح هتاخد 6 درجات
.
الليسننج عباره عن 4 اجزاء :
* جزء اول محادثه بين اتنين في اي موضوع عام زي مثلا مكالمه بين موظف حجز فندق والعميل اللي هيحجز او موظف حجز طيران والعميل اللي هيحجز أو مكالمه بين موظف شركه التأمين و العميل اللي عايز يتأمن عليه .. و الاسئله ف الجزء ده بتكون جدول أو خريطه بتملاه لما بتسمع المكالمه دي ..
.
* جزء تاني دردشه بين اتنين في موضوع اجتماعي او ثقافي معين بتحصل في المجتمع بتاعنا زي مثلا دردشه بين اتنين عن انخفاض نسبه السياحه في مصر الفتره الاخيره ..
.
* جزء تالت عباره عن مناقشه بين كذا شخص في موضوع اكاديمي معين وكل واحد فيهم بيكون ليه رأي وهنا الصعوبه انك لازم تحفظ في دماغك وانت بتسمع اسم كل واحد فيهم وكل واحد منهم قال ايه بسرعه البرق وانت بتسمع
وبيبقي الاسئله في الجزء دة اسئله choose اختار يعني ..
.
* جزء رابع ودة اوسخ جزء في الليسننج عباره عن مقطع صوتي ل شخص بيشرح موضوع معين ( غالبا بيكون مُحاضر علمي ) وانت تكمل ملخص الكلام بتاعه من اللي فهمته منه ..
.
ايه اهم النصائح في الجزء دة ؟؟
.
* نصائح ما قبل الامتحان اثناء المذاكره :
علي حسب عايز تذاكر الجزء دة في قد ايه .. لو عايز تذاكر وانت مش مضغوط ومش مرتبط بوقت .. عايز تذاكر في شهر مذاكره مثلا يبقي هتعمل الاتي :
.
1- فكك من سماع الاغاني والافلام الانجلش ... مش هتفيدك بحاجه .. اسمع قنوات رسميه فورمال زي BBC و Sky TV ..
يعني قصدك اسمع نشرات اخبار و كوفي عنان و الهري دة ؟ لا طبعا .. نشرات اخبار مين والناس نايمين
.
قبل اي ماتش كورة قدم او سله او اي رياضه هتلاقي ع النت لينكات لايف مباشر للاستديوهات التحليله للمتشات دي .. اسمع الاستديوهات دي بالتفصيل الممل وبعدها اسمع الماتش نفسه بتعليق انجليزي هتلاقي نفسك ودانك خدت علي الانجلش وفي نفس الوقت سمعت حاجه بتحبها ومستمتع وانت بتعملها
.
يعني مثلا ماتش تشيلسي واتليتكو مدريد .. افتح قبل الماتش بنص ساعه علي BBC Sports أو Sky Sport واسمع تحليل الماتش والماتش نفسه بالتعليق الانجليزي .. منها ترفيه وتسليه ومنها تستفيد من الانجلش بتاعهم ..
.
ولو مش عايز تسمع متشات كامله او معندكش وقت يبقي تابع صفحه BBC Radio 5 live Sport.وشغلها وانت سايق .. وانت بتاكل .. شغلها في اي وقت ..
.
2- تدخل علي موقع BBC Podcasts ودة بتاع البرامج الثقافيه والتاريخيه اهو احسن من النشرات برضو وممتع جدا وهيفيدك
.
3- اكبر خااااااااازوق في الليسننج هو الارقام وطريقه قرايتها الصحيحه وانت جوة الامتحان .. لانهم في المكالمه بيشبكوا الحروف وهما بيتكلموا وبياكلوا نص الكلام وفي مئات من الارقام اللي بتلخبط
وعشان تضمن اي سؤال ارقام في الليسننج اتفرج علي الفيديو دة .. شرح عربي عالمي لازاي تضمن ان اي رقم يتقال تسمعه وتكتبه بطريقه صح وتضمن درجته
.
* لو انت مضغوظ او عايز تنجز الاستماع في يومين بالكتير
يبقي تفكك من كل اللي فات و تمسك الجزء الجاي دة :
- دي سلسله فيديوهات بالاسئله والاجابات النموذجيه لكل اسئله جزء الاستماع بتاعه IELTS Book السلسله دي بتجيب من الاخر انك تقوم تطبق بنفسك وانت بتذاكر وتحل وتشوف الاجابات الصح
* نصائح وانت جوة الامتحان بتمتحن :
1- اهم حاجه انك تقرأ التعليمات بتاعه الامتحان كويس جدا جدا .. يعني لو مطلوب منك كلمتين فقط تكتب كلمتين بس .. مطلوب 3 كلمات تكتب 3 بس .. قالك ممنوع الاختصارات وتكتب الكلمات كامله يبقي تنفذ المطلوب منك ... لكن هتجود هتلبس في الحيط ودرجتك هتنقص ..
.
2- جرب السماعه بتاعتك کویس قبل ما تبدأ واتأكد انك بتسمع بصوت واضح من غير تشويش عشان لو الصوت مش واضح هتلبس في الحيط
.
3- قبل ما الشريط بتاع المسجل يشتغل حاول تقرأ الاسئله وتلقط بعينك الفكره العامه عن الاسئله ومن خلالها هتقدر تعرف انت هتركز علي انهي حاجات وانت بتسمع ..
.
يعني مثلا في السؤال تلاقيه بيطلب منك اسم موديل عربيه .. يبقي ساعتها من قبل ما تسمع المكالمه اصلا هتعرف ان في المكالمه هيقولك علي اسم عربيه يبقي تركز اوي وانت بتسمع علي اي جزء بيتقال فيه كلام عن عربيات
فاهمني ؟؟ تستشف من السؤال ايه اللي هيكون في الريكورد من قبل ما تسمعه
.
.
4- نص المكامله هتكون عباره عن هررررررررررررررررري .. يعني هتلاقيه بيرغي في اي هري فمتقلقش ومتشتتش نفسك ومتحسش انك تايه ابدا .. ممكن تلاقي اجابات الاسئله اصلا في اول دقيقه من الريكود و باقي الدقائق بيرغي في اي حاجه ..
.
5- لو فاتك سؤال مسمعتوش اوعي تفكر فيه وركز في السؤال اللي بعده علي طول لانك لو فكرت فيه هتشيل نص الاسئله وهتلبس في باقي الليسننج ..
.
6- الاسبيلنج .. لازم تكتب الاسبيلنج صح .. لو انت سمعت صح و لكن كتبت الحروف غلط .. السؤال هيتحسبلك غلط .. ركز وانت بتكتب الكلمات صح .. والاسماء كلها اول حرف كااااااااااابيتال .. لازم يكون اول حرف كابيتال ..
.
7- متقلقش .. في جزء الإستماع ... الأربعة أجزاء مش بتسمعهم ورا بعض من غير ماتحل الأسئله عن كل جزء . لا هيديك فرصة بعد كل قسم لمدة نصف دقيقة تراجع فيها اجاباتك ، وبعد ما تخلص القسم الاخير يديك عشر دقائق لنقل الاجابات لورقة الحل ..
.-----------------------------------------------------------------------
تاني جزء هو القراءة (Reading) : مدته 60 دقيقة
مبدأيا .. جزء الريدنج دة بيقيس مدي سرعتك في قرايه الانجلش ..
* الریدنج عباره عن 3 قطع في الاكاديميك و 5 قطع في الجينرال والقطع في الاكاديميك اصعب من الجينرال بالمناسبه .. لكن عشان الاكاديميك اصعب فبيبقي تصحيحه بدرجات اعلي ..
بمعني لو حليت 23 من اصل 40 بالأكاديمي كدة انت جبت 6 في الايلتس
لكن لو جبت 30 من اصل 40 بالجينرال كدة انت جبت 6 في الايلتس
.
* كل قطعه بيكون عليها حوالي 13 سؤال .. والاسئله دي يأما اختيار من متعدد يأما صح وغلط يأما تحدد وجه نظرك في القطعه يأما توصيل بين الاجابات يأما اسئله اكمل يأما شكل بياني يأما اجابات مختصره مطلوبه منك
.
* متقراش القطعه كلها الاول وتفهمها وبعدين تقرأ الاسئله وتجاوب .. دي طريقه عقيمه فشخ ..
امال تعمل ايه وتحل القطعه بسرعه ازاي ؟؟ في خطوتين اتنين ..
القطعه عباره عن كذا فقره .. اقرأ رأس اول كل فقره واكتب جنبيها بالرصاص الفكره العامه اللي عرفتها من رأس اول فقره دي ... بعدين انزل علي الاسئله شوف السؤال الاول و دور علي اجابته في القطعه و حاول تلقط بعينك مفاتيح القطعه ( طريقه scanning ) وتربطهم ببعض من خلال الاسئله هتلاقي نفسك خلصت القطعه في وقت قياسي ..
.
هديك مثال عشان تفهم .. مثلا رأس فقره في القطعه كانت بتتكلم عن انهيار قطاع السياحه في مصر .. فأنت هتكتب جنب راس الفقره دي عنوان من خيالك زي الهامش كدة ( مثلا سياحه - مصر ) .. عشان تعلم علي الفكره العامه للفقره .. بعدين تنزل ع الاسئله وتقراها .. لقيت السؤال مثلا بيتكلم عن ايه هي اسباب خفض معدلات الناتج القومي من قطاع السياحه
.
كدة خلاص يا معلم هتطلع فوق للهوامش بتاعتك وتربط الكلمات ببعض وهتجاوب من القطعه بطريقه اسرع واسهل بكتير اوي من انك تقرأ القطعه كلها كلمه كلمه وتفهمها كلمه كلمه وبعدين تقرأ الاسئله وتجاوب !
.
برضو مش فاهم اي حاجه من اللي انت بتقول عليها دي اعمل ايه ؟
ولا تزعل نفسك .. خد اتفرج علي الفيديو دة وانت تعرف ازاي تحل بطريقه skimming and scanning
* كل قطعه ملهاش وقت محدد من اصل ال 60 دقيقه بتاعه الامتحان .. يعني ممكن تاخد في القطعه الاولي ساعه الا ربع وتاخد في القطعه التانيه ربع ساعه .. انت حر .. ولكن عشان نكون واضحين .. لو خدت في اتفه واسهل قطعه اللي هي بتكون الاولانيه اكثر من 10 دقائق تبقي انت كدة لبست في الريدنج ..
.
.
* القطع دي بتكون اصليه يعني مش متألفه يعني واخدينها من موضوع اصلي في جريدة او من كتاب عشان كدة قرايه اي جرايد اللي بتصدر بالانجلش في مصر او قرايه المقالات والمجلات والكتب اللي بالانجلش من علي النت مهمه جدا جدا عشان تتدرب علي الريدنج ..
.
* ما تكتبش الاجابه في ورقه الاسئلة. اول ما تلاقي الاجابه اكتبها في الشيت على طول و ركز و انت بتنقلها عشان في الغالب مش هتلاقي وقت تراجع
.
* انا ذاكرت الريدينج من سلسله الفيديوهات دي فيها كل ما تتخيله عن الاسئله اللي ممكن تجيلك .. اتفرج وادعيلي
* برضو زي الجزء اللي فات .. هنا كمان دي سلسله فيديوهات بالاسئله والاجابات النموذجيه لكل اسئله جزء القراءه بتاعه IELTS Book السلسله دي هتفيدك اوي انك تقوم تطبق بنفسك وانت بتذاكر وتحل وتشوف الاجابات الصح
--------------------------------------------------------------------
الجزء التالت وهو الرايتنج : مدته 60 دقيقه
.
بيكون مطلوب منك اتنين تاسك ..
التاسك الاول خطاب ( لو جينرال ) او مقال ( لو اكاديميك ) ب 150 كلمه
التاسك التاني هو Structure ب 250 كلمه ..
.
الرايتنج من الاخر بيعتمد علي حاجتين مفيش غيرهم : vocabulary and grammar
.
ظبط جرامر + ظبط مصطلحات + ظبط اسلوب الكتابه بعلامات الترقيم وخلافه + اتدرب كتير و خلي حد يصححلك .. هتلاقي نفسك بقيت بيرفكت بعد وقت قليل اوي
.
- نفس الكلام اللي فوق .. لو عايز تذاكر وانت مش مضغوط وبراحتك هتعمل اللي جاي ده :
1- ادخل علي موقع English Grammar Secrets فيه كل قواعد الجرامر اللي تتخيلها في حياتك مش هيخليك محتاج اي حاجه في الجرامر من بعده
ودة لينك الموقع :
https://www.englishgrammarsecrets.com
وبعدين ادخل علي الموقع السحري دة :
http://ielts-simon.com
هيفيدك جدا جدا في حل نماذج الامتحان
.
* طب الجرامر وظبته ياعم الحج .. لكن الكلمات اعمل فيها ايه ؟؟
دة فيديو فيه 1000 كلمه انجليزيه شائعه بنستخدمها في حياتنا اليوميه وكمان محطوط لكل كلمه امثله في جمل عشان تبقي عرفت الكلمه وازاي تستخدمها في جمل
https://www.youtube.com/watch?v=YM-sX05GQV8
.
.
.
- لكن افرض انت مزنوق وعايز تنجز الرايتنج .. يبقي فكك من كل اللي فات وركز في اللي جاي
دي سلسله الفيديوهات دي اللي بتجيب في الاخر في الرايتنج حلهم هتبقي بيرفكت :
1- https://www.youtube.com/playlist?list=PLOSo0A8ngEXWhD3_yisOF0qBB4e6sWx01
.
2- https://www.youtube.com/playlist?list=PLOSo0A8ngEXUNqNesQ6cFtmtsL95UZWYh
.
* لو معاك فلوس وعايز حد يصححلك مقالاتك اللي بتكتبها .. في موقع اسمه IELTS blog
بيصححوا ٨ مقالات ب ٢٨ دولار
بس طبعا دة متعملوش الا لو انت مرتاح ماديا ومعاك فلوس وعايز تقفل الرايتنج اوي لكن متبقاش عايز يادوب 6 ولا 7 بالكتير ف الرايتنج وتقوم تدفع عشان حد يصححلك .. انت كدة بترمي فلوسك ف الارض وانت مش محتاج الاوبشن دة اصلا !
-------------------------------------------------------------------
الجزء الاخير وهو الاسبيكنج : مدته حوالي ربع ساعه
.
الممتحن هيسألك علي 3 اجزاء :
الجزء الاول هيسألك اسئله شخصيه زي اسمك ايه و ساكن فين و بتشتغل ايه وبتدرس فين و دور اصحابك في حياتك وايه الهوايات اللي بتعملها وطموحاتك ايه للمستقبل وبتحب انهي الطقس الحر ولا البارد وايه دور اهلك في وصولك للنجاح من عدمه الخ الخ
في الجزء ده اتكلم براحتك .. بهدوء .. دائما اتكلم بابتسامه .. بص في عين الممتحن طول وقت الانترفيو و ملكش دعوة بتعبيرات وشه لانه مش بيديك اي فيدباك مطمئن يعني تحس وشه زي الجبس كده زي كولينا كده الحكم الاوروبي المشهور :D
.
الجزء التاني بيديلك ورقه مكتوب فيه موضوع وعليه اسئله تجاوب عليها بيديك دقيقه واحدة للتحضير و دقيقتين عشان تتكلم عن كل اللي في الورقه
اما يديك الورقه عشان تكتب فيها افكارك اكتب براحتك و خد وقتك .. الدقيقه هتكفي وهتزيد صدقني .. و اتكلم بالراحة عشان الوقت ما يبقاش اكتر من كلامك
.
الجزء التالت بيكون اسئله ليها علاقه بالجزء التاني
يعني مثلا لو كان الجزء التاني عن ثوره 25 يناير فهيبقي اسئله الجزء التالت عن اهدافها و مميزتها وعيوبها الخ الخ الخ
لو مثلا الجزء التاني كان عن فيفي عبده فهيبقي اسئله الجزء التالت عن ال 5 مواااااااااه وفوائدها في الاقوم بليل لأ قوم بالصبح وهكذا ..
.
وتقدر تتفرج علي الفيديو ده عشان تعرف جو امتحان الاسبيكنج بيبقي عامل ازاي بالتفصيل الممل
https://www.youtube.com/watch?v=94qopJYqDXc
.
* نصيحتي ليك ف الجزء دة حاجتين :
1- تتكلم مع اجانب لمدة ساعه يوميا ع الاقل من خلال مواقع كتير اوي زي :
- chatroulette
- omegle
- mapcam
- verbling
- howdoyou
- speaky
مواقع نضيفه وجربتها بنفسي ومفيهاش خلايجه وجو الشقط ده .. متقلقوش .
.
2- لو ليك دكتور ( معيد او استاذ ) صاحبك وحبيبك من ايام الجامعه .. روحله وخليه يقعد معاك يعملك كام انترفيو واقعي كانه هو اللي بيمتحن ويكلمك بالانجلش عشان تبقي متعود علي جو الانترفيوهات .. لان في ناس بتبقي الانجلش بتاعها بيرفكت لكن مبيعرفوش يتكلموا في الانترفيوهات وبيتلبخوا ويرتبكوا وعايزين تدريب علي الحوار ده ..
.
في حاله لو معندكش الاوبشن الاول او التاني يبقي مفيش غير انك تعمل sound record لنفسك وبعدين تسمعه كل يوم عشان تشوف الغلطات بتاعتك وتحاول تعالجها بالتدريب .. يعني تشوف صوتك بيبقي واضح ولا لأ .. مقلق ولا لأ .. مخارج نطق الحروف عامل ازاي .. وهكذا .. وتحاول تحسنه مع الوقت كل يوم
.
ملحوظه : في كمان حل ممتاز وبديل .. تدخل علي جروبات الايلتس الاجنبيه العالميه اللي كلها اجانب زي IELTS MOOC Study Group
.
وتطلب من الناس اللي هناك انهم يساعدوك في الاسبيكنج وانهم يعملوا فيديو كول معاك وتتواصل معاهم يوميا وبكده تبقي حليت مشكله ممارسه اللغه مع الاجانب
.
ويوم الامتحان الصبح شوف اي حد من صحابك او حد داخل الامتحان زيك واتكلم معاه بالانجلش من غير ما تتكلم اي كلمه عربي زي محادثه كدة بينكم عشان تبقي بروفه يعني
.
ال speaking بيتحدد ميعاده قبل الامتحان بأسبوع .. يا بيكون قبل ال 3 فروع الباقيين بيوم أو اتنين .. يا بيكون في نفس اليوم مع باقي الاجزاء .. يا بيكون بعد ال 3 فروع الباقيين بيوم أو اتنين
------------------------------------------------------------
طيب ياعم احمد انا سامع ناس كل شويه تقول اشتري كتب كامبريدج اشتري كتب كامبريدج اشتري كتب كامبريدج ! وبسمع ناس بتدفع فيهم مبالغ كبيرة جدا !
طيب اشتريهم ليه اصلا وكل حاجه موجودة ع النت زي ما انت بتقول ؟؟
.
بص يا معلم الحوار ده اصلا سبوبه كبيره لناس كتير اوي .. ناس بتعمل مصالح علي قفاك ..
.
الكتاب الاصلي الواحد بيعمله حوالي 30 دولار وطبعا محدش هيدفع المبالغ دي في كتب .. الناس بتكح تراب اصلا .. فبيدوروا علي بدائل ارخص ..
.
تلاقي بقي واحد مسمي نفسه سفير الايلتس او المدرس العالمي للايلتس يستغل الحوار ده و يعمل اعلان لنفسه ولصفحته و يجيب لينكات للكتب دي وينزلها
.
ايوة يعني فين الاكشن في الموضوع ؟ مهو دة طبيعي وعادي فين النصب في اللي بتقوله ؟؟
.
اتقل يا معلم .. التقيل جاي لسه .. المدرسين دول بيعملوا حاجه من 3 :
1- بينزلوا لينكات مش شغاله للكتب دي
2- تكون لينكات شغاله ولكن يكون مديهم باسورد غلط لفتح الملفات
3- تكون لينكات شغاله وباسورد صح لكن تحميلها ب 2 جيجا و 3 جيجا ومن غير تورنت !
.
وطبعا الناس بتبقي محتاسه ومش عارفه تنزلهم وبيدوروا علي اي قشه يتعلقوا بيها فيروحوا يسألوا المدرسين دول انبوكس .. يقوم المدرسين دول يقولولهم خلاص خلاص يا معلم انا هديك عنوان مكتبه في سور الازبكيه بتبيع نسخ طبق الاصل من الكتب دي وهقولهم انك من طرفي عشان يعملولك خصم
.
و لما تروح بقي المكاتب دي هتلاقيهم بيرموك لبعض بمعني هتلاقي اصحاب المكاتب تقولك : كان علي عيني ( بصوت عبله كامل ) الكتب خلصت بس انا اعرف واحد ممكن ينزلهم من ع النت ويعملهملك طباعه وتجليد وخدمه توصيل محافظات كمان بس شخلل عشان تعدي
.
الطريقه التانيه للنصب بقي تلاقي كذا واحد في بوستات ورا بعض في جروبات للايلتس كلهم في بوق واحد وهما بيكتبوا تجربتهم يقولوا احنا مكناش بنعرف نذاكر اونلاين عشان كدة اشترينا الكتب .. ومش هتعرف تذاكر الا والكتاب قدامك زي ما انت متعود طول عمرك ..
.
بيحبطوا الناس انهم مش هيعرفوا يذاكروا اونلاين ولازم عشان يذاكروا كويس ويجيبوا سكور زيهم لازم يشتروا الكتب .. وطبعا الناس تدخل تسألهم جبتوا الكتب منين فيدلوهم علي محاسيبهم من اصحاب المكتبات وتتعمل نفس المصلحه علي قفاك ..
.
اشتغالات وحوارات بشوفها يوميا من شويه ناس عايزين الحرق بيستغلوا حاجه الشباب للمعلومه عشان يمصلحوا من وراهم ..
.
ودي السلسله من علي جوجل درايف
عموما لو معرفتش تنزلهم من ع النت ومش معاك فلوس عشان تشخللها للمدرسين .. هديك موقعين عالميين للايلتس موقع IELTS BUDDY و موقع Engvid هتستفيد منهم بديل عن كتب كامبريدج وفيهم كل الاسئله واجوبتها اللي تتخيلها في حياتك عن الايلتس اساسا
.
ودة لينك المواقع عشان عارف يا خلبوص انك هتفخد وهتكسل تعمل سيرش عليهم في جوجل
------
طيب يا ابو حميد .. يوم الامتحان بقي تعمل ايه من اول لما تصحي الصبح ؟؟
.
هتصحي الصبح بدري .. تصلي ركعتين .. تشرب قهوتك .. تضرب سيجارتك .. تلبس وتتكل
.
هناك الدنيا هتلاقيها منظمه اوي
.
- بياخدوا منك كل حاجه علي البوابه حتى الموبايل باستثناء البطاقه أو الباسبور و اقلامك فقط هما اللي بتدخل بيهم
- بتحط حاجتك في شنطة و بتاخد رقم
- هما من نفسهم بيدوك قلم رصاص واستيكه و برايه و بتسيبهم وانت خارج
- بلاش تعمل زي الدحيحه وتدخل بدري عشان هتزهق فشخ علي ما يبدأوا خليك برا مع الناس احسن
- نصيحه اخويه لو مكانك في الامتحان جنب التكييف اطلب قبل ما يبدأ الامتحان انهم يغيرولك مكانك عشان هتتفشخ التهاب رئوي لما تخلص
- هتسيب الباسبور او البطاقه علي طرف الديسك اللي قدامك وهما هييجوا ياخدوه ويرجعوه تاني
.
دة القوانين العامة بس مش شرط كل فرع يطبقة ، فى فروع ممكن يخليك مثلا تدخل بالموبايل عادي بس يكون مقفول .. بتختلف حسب سيستم الفرع يعني ..
-------------------------------------------------------------------------
لو مفيهاش اساءه ادب يعني بلاش تسرق البوست زي كل مره .. عمنا الحرامي احلي مسا عليك معلش تعالي علي نفسك المره دي وبلاش البوست ده
.
لان انت مجربتش الموضوع بنفسك ومبتفهمش فيه فلو سرقته ونقلته ف مكان تاني والناس حبت تسألك علي اي جزئيه مش هتعرف ترد او هترد غلط وتخلي الناس تلبس في الحيطه
منقول
هل يوجد منح لدراسة اللغة الإنكليزية؟
ردحذف